چوخلار اینجیکدی که سن اونلارا ناز ایله میسن

من ده اینجیک که منیم نازیمی آز ایله میسن

ائتمیسن نازی بو ویرانه کونولده سلطان

ائوین آباد اولا درویشه نیاز ایله میسن

هر باخیشدا چالیسان کیرپیگی مضراب کیمی

بیر قولاق وئر بوسینیق قلبی نه ساز ایله میسن

باشدان آچ یایلیغی افشان ائله سوسن – سنبل

سن بیزیم بایرامیمیزسان قیشی یاز ایله میسن

سن گون اول قوی غمی میز داغدا قار اولسون اریسین

منیم آنجاق ایشیمی سوز و گداز ایله میسن

من بو معناده غزل یازمالی حالیم یوخودور

سن جوجوق تک قوجانی فرفره باز ایله میسن

کاکلی باشدا بوروب باغلامیسان تاج کیمی

او قیزیل ساچدان اونا گوللی قوتاز ایله میسن

سینه بیر دشت مغان دیر قوزی یان – یانه یاتیب

منیم آغلار گوزومی اوردا آراز ایله میسن

بو گوزللیک کی جاهاندا سن وئرمیش تاری

هر قدر ناز ائله سن ایله کی آز ایله میسن

دستماز ایله دیگین چشمه مسیحا قانی دیر

بیلمیرم هانسی کلیساده نماز ایله میسن؟

من ( عشیران ) اوخوسام پنجه ( عراق) اوسته گزه ر

گوزلیم تورک اولالی ترک ( حجاز ) ایله میسن

تازا شاعیر بو دنیز هر نه باخیرسان دیبی یوخ

چوخ اوزاتسان بوغازی اوردگی قاز ایله میسن

بسکی زلف و خط و خالین قوپالاغین گوتدون

زلفعلی نین ده باشین آز قالا داز ایله میسن

گل ! منیم ایسته دیگیم کعبه ییخیلماز اوجالار

باشدادا کژ گئده سن دیبده تراز ایله میسن

خط وخالیندن آلیب مشقیمی قرآن یازارام

بو حقیقت له منی اهل مجاز ایله میسن

آی دان اولدوز منی سن یاخشی تانیرسان کی سحر

افقی خلوت ائدیب راز و نیاز ایله میسن

(( شهریار)) ین داغیلیب داغدا داشا دالدالانیب